جدة

المقعد.. ( الحلقة الواحدة وعشرون) .. قبة عشرة

المستشار مروان عبدالفتاح عبدربه
حارة اليمن

من منا لا يذكر قبة عشرة، ومن منا لم يقعد ويقضي عصرية الجمعة بها،، ومن منا لم يشاهد بحر جده من فوقها وابواتها ولنشاتها وقواربها رايحه جايه من أمامنا .
تقع قبة عشره في ابحر الحنوبيه شرق ما يسمى بشاطئ الاسكندريه في يومنا هذا والذي اصبح مقراً لمعرض الكتاب الدولي السنوي.
كانت عوائل جده بمختلف فئاتها وطبقاتها تحرص على قضاء العصريه في هذا المتنفس الذي يكاد يكون وحيدا في ذلك الزمن لترفيه الكبار والصغار
طبعا كنّا من قبل العصر نجهز أغراضنا في ذلك الشفر البوكس وكل واحد في العيله له اغراضه اللي يحب يلعب بيها البسكليته والكوره كانت من اهتماماتي انا واخواني فهد ومجدي.
كلنا نفتكر انو قبة عشره فيها مرتفعات ومنخفضات تساهم في سعادتنا لمن نسوق البسكليته وندحدر بيها وهاتك لمن نجي راجعين على طلعاتها المتابع لمن ينقطع نفسنا.
مما اذكره طبعا في المأكل والمشرب الحلاوه البقره والحلاوة ام القهوه والحمص والفصفص والزرنباك والبسكوت اللي كنّا نغمس بيه الشاهي وكان له طعم خاص
قبل دا كله لازم نحط المفرشه الكبيره عشان تشيل جلسة العيله وما تتصورا لمن كان ابويا الله يرحمه يقول يلا ياولدي تعالوا نشيل المفرشه لانها طبعا كبيره وتقيله كنّا ننبسط لمن كانوا أهالينا يرسلونا نعمل شي يعني اننا كبرنا
كان بيت عمي احمد يشاركونا دايما في طلعاتنا سواء داخل جده او المدينه على ساكنها افضل الصلاة والسلام او حتى رحلات الطايف.
المهم نرجع لقبة عشره اذكر السياره البرمائية اللي كانت تمشي قدامنا في طريق ابحر وبعدين تنزل للبحر وتتحول أشبه ماتكون قارب يمشي في وسط البحر.
كانت ايام جميله تجتمع فيها العوائل في هذه المنطقه البحريه وطبعا قبل ما تغرب الشمس نكون جمعنا أغراضنا في الشفر البوكس ونحرك قبل ما تضلم الدنيا فلا اناره ولا لمبات في شوارع تلك المنطقه
كان ابويا الله يرحمه حريص اننا نتعشى من شاورما شاكر اللي كنّا نوصله قبل اذان العشاء ونأخذ العصير من ملك المنجا دولا المحلين كنّا نشتاق لهم حل جمعه وكان لهم طعم مميز ديك الأيام
نوصل بيتنا نتروش ونحط روسنا على فرشنا زي القتله من تعب اللعب في قبة عشره
واااااااه من جمالك ياجده في تلك الأيام التي كانت تجمع اَهلها في مكان واحد والكل سعيد ومبسوط
والى لقاء قادم مع الذكريات الجداويه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

الرجاء ادخال الاجابة الصحيحة *